ចលនាខ្មែរដើម្បីប្រជាធិបតេយ្យ (KMD) សូមអបអរសាទរចំពោះអង្គសមាជរដ្ឋសភា និងព្រឹទ្ធសភា នៅថ្ងៃទី២ ខែមិថុនា ឆ្នាំ២០២៥ ដែលបានអនុម័តគាំទ្រដោយសំឡេង១៨២សំឡេង លើសេចក្តីថ្លែងការណ៍របស់នាយករដ្ឋមន្រ្តីនៃព្រះរាជាណាចក្រកម្ពុជាក្នុងការប្តឹងរឿងបញ្ហាជម្លោះព្រំដែនកម្ពុជា ថៃ ទៅតុលាការអន្តរជាតិ ។ សេចក្តីសម្រេចរបស់រាជរដ្ឋាភិបាល និង ដោយមានការគាំទ្រពីសភាទាំងពីរ គឺពិតជាស្របទៅនឹងសេចក្តីប្រាថ្នាចង់បានរបស់ពលរដ្ឋកម្ពុជាទាំងក្នុង​ និងក្រៅប្រទេស។

បន្ថែមលើសពីនេះទៀត ចលនាខ្មែរដើម្បីប្រជាធិបតេយ្យ (KMD) ក៏សូមលើកទឹកចិត្តដល់រាជរដ្ឋាភិបាលប្រើវិធានការដូចគ្នានេះផងដែរចំពោះករណីដទៃទៀតដូចជា ករណីជម្លោះនៅតំបន់អានសេះ បញ្ហាកោះគុត និងដែនសមុទ្រត្រួតស៊ីគ្នាជាមួយប្រទេសថៃដែលរដ្ឋាភិបាលត្រូវដាក់ពាក្យប្តឹងទៅតុលាការអន្តរជាតិ។​ ជាមួយគ្នានេះផងដែរ រាជរដ្ឋាភិបាលគួរគិតពិចារណាផ្តល់សច្ចាប័នលើ UNCLOS ដែលជាលិខិតតូបករណ៍អន្តរជាតិការពារនូវដែនសមុទ្រកម្ពុជា។

ម្យ៉ាងវិញទៀតចលនាខ្មែរដើម្បីប្រជាធិបតេយ្យ (KMD)សូមសំដែរនូវការកោតសរសើរចំពោះប្រជាពលរដ្ឋទាំងក្នុងនិងក្រៅប្រទេសដែលបានចូលរួមបញ្ចេញមតិយោបល់តាមគ្រប់មធ្យាបាយសំដៅរួមចំណែកការពារបូរណភាពទឹកដីកម្ពុជាកន្លងមក។ KMD សង្ឃឹមថាបងប្អូនខ្មែរនិងបន្តស្មារតីនេះទៅមុខទៀត ព្រោះការចូលរួមតាមគ្រប់រូបភាពជាកតព្វកិច្ចរបស់យើងក្នុងមានជាម្ចាស់ស្រុក។

ទោះជាយ៉ាងណាក៏ដោយ ចលនាខ្មែរដើម្បីប្រជាធិបតេយ្យ (KMD) សង្ឃឹមយ៉ាងមុតមាំថាលោកនាយករដ្ឋមន្រ្តី ហ៊ុន ម៉ាណែត ដែលបានថ្លែងថា « បើទោះបីជាភាគីថៃ មិនឯកភាពជាមួយយើង នៅក្នុងការយកបញ្ហានេះទៅ ICJ ក៏កម្ពុជានឹងប្ដឹង ICJ ដើម្បីបញ្ចប់បញ្ហា» នឹងពិតជានាំយករឿងក្តីទាក់ទងនឹងតំបន់ជម្លោះនៅតំបន់មុំបី ប្រាសាទតាមាន់ធំ ប្រាសាទតាមាត់តូច និងប្រាសាទតាក្របី ប្តឹងជាផ្លូវការទៅតុលាការអន្តរជាតិនាពេលឆាប់ៗខាងមុខនេះ៕